मेचीनगर नगरपालिका

मेचीनगर नगरपालिका पूर्वी नेपालको कोशी प्रदेशमा पर्ने झापा जिल्लाको पूर्वी भागमा अवस्थित एक नगरपालिका हो। झापा जिल्लाका दुई प्रमुख बजारहरू काँकडभिट्टा र धुलावारीलाई वि.सं. २०५३ माघ ११ गते मिलाएर घोषणा गरिएको मेचीनगर पूर्वी नेपालको प्रमुख उद्योगिक तथा वाणिज्य केन्द्र हो। यस नगरपालिका अन्तर्गत रहेको काँकडभिट्टा नाका नेपालको भारत तथा बङ्गलादेशसँग व्यापार गर्ने एक प्रमुख नाका हो। वि.सं. २०७३ फाल्गुन २२ मा धाइजन, दुवागढी, बाहुनडाँगी र ज्यामिरगढी गाविसहरू समेत यसमा गाभेर यो नगरपालिकाको क्षेत्र विस्तार गरिएको थियो। कुल १५ वडामा विभाजित यो नगरपालिकाको जनसङ्ख्या वि.सं. २०६८ सालको जनगणना अनुसार १,११,७३७ रहेको छ।

मेचीनगर नगरपालिका
नगरपालिका
नेपाल भारत सीमा स्तम्भ
मेचीनगर नगरपालिका नक्सामा मेचीनगर नगरपालिका मेचीनगर नगरपालिका मेचीनगर नगरपालिका (नेपाल)
निर्देशाङ्क: २६°४०′००″उ॰ ८८°०७′२०″पू॰
देश	नेपाल
प्रदेश	कोशी प्रदेश
जिल्ला	झापा
स्थापना	वि.सं. २०५३ माघ ११
समावेश (गाविस)	धुलावारी र काँकडभिट्टा
सम्मिलित (मिति)	वि.सं. २०५३ माघ ११
समावेश (गाविस)	धाइजन, दुवागढी, बाहुनडाँगी र ज्यामिरगढी
सम्मिलित (मिति)	वि.सं. २०७३ फाल्गुन २२
सरकार
• मेयर	गोपालचन्द्र बुढाथोकी नेकपा (एमाले)
• उपप्रमुख	मीनाकुमारी पोख्रेल नेकपा (एमाले)
क्षेत्रफल
• जम्मा	१९२.५२ किमी२ (७४.३३ वर्ग माइल)
जनसङ्ख्या  (राष्ट्रिय जनगणना २०७८)
• जम्मा	१३३,०७३
• क्रम	४औँ (कोशी प्रदेश) १८औँ (नेपाल)
• घनत्व	६९०/किमी२ (१८००/वर्ग माइल)
समय क्षेत्र	युटिसी+५:४५ (नेपालको प्रमाणिक समय)
हुलाक कोड	५७२०४
क्षेत्रीय सङ्केत	+९७७-२३
वेबसाइट	mechinagarmun.gov.np

इतिहास

वि.सं. २०५४ को पहिलो चुनावमा नेकपा (एमाले) का रविन कोइराला र चन्द्र भण्डारी क्रमशः नगरप्रमुख र उपप्रमुखमा निर्वाचित भई वि.सं. २०५९ को असार मसान्तसम्म पदमा बहाल रहेका थिए। वि.सं. २०६० असोज १४ गते कल्यान खड्का र जितन राजवंशी क्रमशः नगरप्रमुख र उपप्रमुख मनोनित भएर वि.सं. २०६१ असार मसान्तसम्म पदमा आसिन रहेका थिए। पूर्वी नेपालको हङकङ बजारको नामले चर्चित धुलावारी तथा पूर्वको मुख्यद्वार मानिने काँकडभिट्टा गाविसलाई एकैठाउँमा गाभेर र धाइजन, दुहागढी, ज्यामिरगढी र बाहुनडाँगी गाविसका केही भाग समेटेर नेपाल भारतको सिमानामा पर्ने मेची नदी तथा तत्कालिन मेची अञ्चलकै नामबाट 'मेचीनगर नगरपालिका' नामकरण गरि वि.सं. २०५३ माघ ११ गते यसलाई सरकारद्वारा नगरपालिका घोषणा गरिएको थियो। नेपालमा सङ्घीय शासन व्यवस्था लागू भएपछि वि.सं. २०७४ मा सम्पन्न भएको पहिलो स्थानीय तह निर्वाचनमा नेपाली काँग्रेसका बिमल आचार्य नगर प्रमुख पदमा र नेकपा एमालेकी मिना उप्रेती नगर उप-प्रमुख पदमा निर्वाचित भएका थिए। वि.सं. २०७९ मा सम्पन्न दोस्रो स्थानीय तह निर्वाचनबाट नेकपा (एमाले)का गोपालचन्द्र बुढाथोकी र मीना उप्रेती क्रमशः नगर प्रमुख र नगर उप-प्रमुख पदमा निर्वाचित भएका छन्।

जनसङ्ख्या

राष्ट्रिय जनगणना २०७८को जनगणना अनुसार मेचीनगर नगरपालिकाको कुल जनसङ्ख्या १,३३,०७३ रहेको छ भने यहाँ ३२,६९५ घरधुरी रहेका छन्।

भौगोलिक स्थिति

कुल १९२ वर्ग किलोमिटर क्षेत्रफलमा फैलिएको यस नगरपालिकाको पूर्वमा भारत, पश्चिममा अर्जुनधारा नगरपालिका र विर्तामोड नगरपालिका, उत्तरमा बुद्धशान्ति गाउँपालिका र इलाम जिल्ला र दक्षिणमा भद्रपुर नगरपालिका पर्दछन्। यस नगरपालिकामा हिन्दू, किरात, बुद्ध, श्रीकृष्ण प्रणामी, मुस्लिम, शैव, वैष्णव, साई, यशु तथा मानव धर्म मान्नेको वाहुल्य पाइन्छ। नेपाल अधिराज्यमा मात्र नभएर विश्वमै लोपोन्मुख किसान जाति यो नगरमा मात्र बसोबास गरेको पाइन्छ। यस बाहेक यहाँ धिमाल, दनुवार, मेचे, थारू चौधरी, सुनुवार, राई, लिम्बु, भोटे, तामाङ्ग, शेर्पा, नेवार, मगर, गुरुङ्ग, भुजेल, राजवंशी, जोगी, ब्राम्हण, क्षेत्री, माझी र कुमाल जातिको बसोवास रहेको छ।

रितिथिति

पातालगङ्गा, बौद्ध गुम्बा, विश्वनाथ मन्दिर, पञ्चमुखी हनुमान मन्दिर, दुर्गा मन्दिर, काली मन्दिर, पशुपतिनाथ मन्दिर, कृष्ण प्रणामी मन्दिर यहाँका प्रमुख पर्यटकीय स्थल हुन्।

बाह्य कडीहरू

• मेचीनगर नगरपालिका वेब्याक मेसिन अभिलेखिकरण २०१८-०२-०२ मिति