म्याङलुङ नगरपालिका

म्याङलुङ नगरपालिका तेह्रथुम जिल्लाका २ नगरपालिकाहरू मध्ये एक हो। २५ वैशाख २०७१ मा, नगरपालिका घोषणा गर्दा साविकका म्याङलुङ, ताम्फुला, पिप्ले, आम्बुङ, सावला र जिरिखिम्ती गाविसहरू यसमा गाभिएका थिए। यो जिल्लाको सदरमुकाम समेत हो।

म्याङलुङ नगरपालिका
नगरपालिका
कोशी प्रदेशको नक्सामा म्याङलुङ नगरपालिकाको अवस्थिति म्याङलुङ नगरपालिका (नेपाल)
निर्देशाङ्क: २७.२१°N ८७.६४°E / 27.21; 87.64
देश	नेपाल
प्रदेश	कोशी प्रदेश
जिल्ला	तेह्रथुम
स्थापित	२५ वैशाख २०७१
सरकार
• नगरप्रमुख	सञ्जयकुमार तुम्वाहाङफे (नेकपा (एमाले))
• उपप्रमुख	जमुनादेवी सुवेदी (नेकपा (एमाले))
क्षेत्रफल
• जम्मा	१००.२१ किमी२ (३८.६९ वर्ग माइल)
जनसङ्ख्या  (राष्ट्रिय जनगणना २०७८)
• जम्मा	१८,७५०
• घनत्व	१९०/किमी२ (४८०/वर्ग माइल)
समय क्षेत्र	युटिसी+५:४५ (नेपाली समय)
क्षेत्रीय सङ्केत	+९७७-०२६
वेबसाइट	आधिकारिक वेबसाइट

जनसङ्ख्या

राष्ट्रिय जनगणना २०७८को जनगणना अनुसार म्याङलुङ नगरपालिकाको कुल जनसङ्ख्या १८,७५० रहेको छ भने यहाँ ४,८७२ घरधुरी रहेका छन्।

नामकरण

म्याङ्लुङ नाम कसरी रहन गयो भन्ने रोचक कथा छ । लिम्बू भाषामा 'म्याउँ'को अर्थ बिरालो र 'लुङ्ग'को अर्थ ढुङ्गा हुन्छ । म्याउलुङबाट अपभ्रंश भई म्याङलुङ भएको स्थानीय बूढापाकाहरूको भनाइ छ । प्रचलित लोककथा अनुसार धेरै पहिले डाँडाको एक चौतारामा दुइ ढाक्रे बास बस्न पुगेछन् । रातको समयमा खाना पकाउन ढुङ्गा खोजी चम्का लगाएर खाना पकाउन लाग्दा आगोको तापसँगै उक्त ढुङ्गा काँप्न थाल्यो । उक्त ढुङ्गा निकै तातेपछि काँप्दै लड्न पुग्यो र उनीहरूको खानासमेत पोखियो । रिसको झोकमा उनीहरूले सो ढुङ्गामा तरबार प्रहार गरे, तरबार प्रहारका क्रममा ढुङ्गाबाट म्याउँको आवाज आएको र त्यसबाट रगतसमेत बगेका कारण ढाक्रेहरू डराएछन् । उनीहरूले यो कुरा स्थानीय बासिन्दाहरूलाई सुनाए । उक्त घटना सुनिसकेपछि गाउँलेहरूले अब अनिष्ट हुने भयो भनी सो ढुङ्गालाई बाजागाजासहित हालको म्याङलुङ बजारको मध्यभागमा रहेको चौताराको वरको रूखको फेदमा स्थापित गरे । त्यहाँ पूजाआजा गर्ने, भाकल गर्ने र बलि चढाउने चलन अहिले पनि छ । यहाँको हावापानी मध्यम खालको भएकाले वातावरण रमणीय छ ।

बाह्य कडीहरू

• जिल्ला समन्वय समितिको कार्यालय, तेह्रथुम