सानु शर्मा

सानु शर्मा नेपाली भाषाकी कथाकार, उपन्यासकार तथा कवि हुन्। आफ्नो लेखनका माध्यमबाट नेपाली साहित्यमा स्पष्ट उपस्थितिसहित सिर्जनारत शर्माका कथा तथा उपन्यासका पुस्तक प्रकाशित रहेका छन्।

सानु शर्मा
जन्म	प्रसूति गृह, काठमाडौँ, नेपाल
राष्ट्रियता	नेपाली
पेशा	लेखन, नर्सिङ
चिनारीको कारण	उपन्यास, कथा
उल्लेखनीय कार्य	अर्को देशमा उत्सर्ग एकादेशमा विप्लवी

प्रारम्भिक जीवन

काठमान्डौको थापालथलीस्थित प्रसूति गृहमा जन्मिएकी सानु शर्मा तराई र काठमाडौँमा हुर्किएकी हुन् । उनी पेसाले नर्स हुन्।

लेखन जीवन

मूल लेखनका रूपमा उपन्यास तथा कथा विधामा कलम चलाउने सानु शर्माका फुटकररूपमा कविता तथा गजलहरू पनि प्रकाशित रहेका छन्। उनको पहिलो उपन्यास वि.सं. २०६० मा प्रकाशित अर्धविराम हो । उनको दोस्रो उपन्यास जीतको परिभाषा वि.सं. २०६६ मा प्रकाशित भएको हो । उनले आफ्नो तेस्रो उपन्यास अर्थ वि.सं. २०६७ मा प्रकाशित गराएकी हुन्। वि.सं. २०७४ मा उनको चौथो उपन्यास विप्लवी काठमाडौँ स्थित फिनिक्स बुकबाट प्रकाशित भयो ।

'विप्लवी' प्रकाशन भएलगत्तै वि.सं. २०७४ मा उनले आफ्नो पाँचौँ पुस्तक तथा पहिलो कथासङग्रह एकादेशमा साँग्रिला बुक्स मार्फत् प्रकाशित गराइन्। सो कथासङ्ग्रह एकादेशमा ले निकै चर्चा पाउनुका साथै वि.सं. २०७४ का लागि मदन पुरस्कारका लागि मनोनयन भयो।

सानु शर्माको पाँचौँ उपन्यास उत्सर्ग र छैटौँ उपन्यास फरक क्रमशः वि.सं. २०७७ र वि.सं. २०७८ मा साँग्रिला बुक्सबाट प्रकाशित भए। शर्माको आठौँ पुस्तक तथा सातौँ उपन्यास ती सात दिन' २०८० साल भदौमा रत्न पुस्तक भण्डारबाट प्रकाशित भयो । शर्माले २०८० साल चैतमा फाइन प्रिन्ट नामक प्रकाशन गृहबाट आफ्नो दोस्रो कथासङ्ग्रह अर्को देशमा प्रकाशित गराइन् । कविता, गीत र गजलमा पनि कलम चलाउने शर्माका बीसवटा गजलहरू कैफियत २ शीर्षकको संयुक्त गजलसङ्ग्रहमा प्रकाशित छन् ।

मुख्य कृतिहरू

• अर्को देशमा (कथासङ्ग्रह) वि.सं. २०८०
• ती सात दिन (उपन्यास) वि.सं. २०८०
• फरक (उपन्यास) वि.सं. २०७८
• उत्सर्ग (उपन्यास) वि.सं. २०७७
• एकादेशमा (कथासङ्ग्रह) वि.सं. २०७४
• विप्लवी (उपन्यास) वि.सं. २०७४
• अर्थ (उपन्यास) वि.सं. २०६७
• जीतको परिभाषा (उपन्यास) वि.सं. २०६६
• अर्धविराम (उपन्यास) वि.सं. २०६०