प्राजक्ता कोली

प्राजक्ता कोली (मराठी: प्राजक्ता कोळी) एक भारतीय युट्युबर र ब्लगर हुन् । उनी युट्युबमा "मोस्टलीसेन" भनेर प्रसिद्ध छन् । उनका भिडियोहरूमा दैनिक जीवन र सामान्य स्थितिहरूलाई हास्य रूपमा प्रस्तुत गरिन्छ ।

प्राजक्ता कोली
सन् २०१८ मा प्राजक्ता कोली
व्यक्तिगत जानकारी
जन्म	(1993-06-27) २७ जुन १९९३ मुम्बई, भारत
राष्ट्रियता	भारतीय
पेसा	युट्युबर ब्लगर
वेबसाइट	mostlysane.in
युट्युब जानकारी
च्यानल	मोस्टलीसेन
सक्रिय वर्ष	सन् २०१५ - अहिलेसम्म
प्रकृति	हास्य ब्लग प्रेरणादायक
पाठक	५७.४ लाख (१ अक्टोबर २०२०)
कूल झलक	७७.२ करोड (१ अक्टोबर २०२०)
प्ले बटन १,००,००० पाठकहरू सन् २०१६ १०,००,००० पाठकहरू सन् २०१९

कार्य जीवन

उनले सन् २०१५ मा आफ्नो युट्युब च्यानल सुरु गर्नु अघि फिभर १०४ एफएममा प्रशिक्षार्थीको पदमा आफ्नो कार्य जीवनको सुरुवात गरेकी हुन् ।

प्राजक्ता युट्युबको प्रमुख कार्यकारी अधिकृत सुसन वोज्सिकीसँग युट्युबलाई युवाहरूका लागि सुरक्षित बनाउन चालिएका कदमबारे अन्तर्वार्ता गर्ने प्रथम डिजिटल निर्माता बनेकी छन् ।

कोलीले करीना कपूर खान, नवाजुद्दीन सिद्दीकी र विक्की कौशलजस्ता बलिउड अभिनेताहरूसँग काम गरेकी छन् । यसका साथै उनलाई क्याप्टेन मार्वलको पहिलो प्रस्तुतिमा ब्री लार्सन र स्याम्युएल एल ज्याक्सनसँग अन्तर्वार्ता गर्न मार्वलद्वारा निम्त्याइएको थियो ।

सन् २०१८ मा दिल्ली र सन् २०१९ मा मुम्बईमा युट्युब फ्यानफेस्टमा प्रदर्शन गरेकी थिइन् । डिसेम्बर २०१८ मा उनले ह्वाट्सएपको माध्यमबाट गलत सूचनाको प्रवाहबाट सावधान रहन सचेत गराउने विज्ञापन रेकर्ड गरेकी थिइन् ।

फेब्रुअरी २०१९ मा उनी फोर्ब्सको ३० अन्डर ३०, आउटलुकको विमेन अफ वर्थ र अन्ट्रप्रनुर इन्डियाको ३५ अन्डर ३५ मा सूचिकृत भइन् । त्यही वर्ष उनी कस्मोपोलिटनको युट्युबर अफ द यरबाट पनि पुरस्कृत भइन् ।

२१ जनवरी २०२० मा उनको प्रिट्टी फिट नामक युट्युब ओरिजिनल्स शृङ्खलाको पहिलो भागको प्रसारण गरियो, जसमा उनले करीना कपूर, नेहा कक्कड, सानिया मल्होत्रा, आरजे मलिश्का, मिथिला पाल्कर र सुमुखी सुरेशजस्ता प्रभावकहरूसँग अन्तर्वार्ता गर्नुको साथै विभिन्न रोमान्चक खेल खेलिन्छ ।

जनवरी २०२० मा कोलीलाई ग्राजिया इन्डियाको वार्षिक कूल लिस्टमा समावेश गरिएको थियो । अप्रिल २०२० मा बिजनेसवर्ल्डको सबैभन्दा प्रभावकारी महिलाहरूको सूचिमा उनलाई राखिएको थियो ।

जुलाई २०२० मा उनले यशपाल शर्माको साथ हरियाणाका ग्रामीण क्षेत्रका महिलाहरूलाई सशक्त बनाउने छोटो चलचित्र खयाली पुलावमा देखिइन् ।

सामाजिक अभियान

#iPledgeToBeMe

सन् २०१६ मा विश्व मानसिक स्वास्थ्य दिवसको अवसरमा कोलीले #iPledgeToBeMe अभियानको सुरुवात गरिन्, जसले मानसिक स्वास्थ्य र आफ्नो शरीरलाई स्वीकार्नुमा जोड दिन्छ । मे २०१७ मा उनले आफ्नो शरीरलाई स्वीकार्ने क्रममा आएका बाधाहरूबारे खुलासा गर्दै शेमलेस नामक र्याप गीत निकालिन्, जसको भिडियोमा रफ्तार, आरजे मलिश्का र मिथिला पाल्करलाई देख्न सकिन्छ ।

#GirlsCount

सन् २०१८ मा उनले महिला शिक्षाको महत्त्वबारे चर्चा गर्दै वन क्याम्पेनको #GirlsCount अभियानमा आफ्नो सहभागिता जनाइन् ।

द युएन एन्ड गोलकीपर्स इनिशिएटिभ

सेप्टेम्बर २०१९ मा उनी अन्तर्राष्ट्रिय सहिष्णुता दिवसको अवसरमा भारतको प्रतिनिधिको रूपमा संयुक्त राष्ट्र सङ्घको सचिवालय र बिल र मेलिन्डा गेट्स संस्थानको गोलकीपर्स अभियानमा सहभागी हुन न्यू योर्क पुगेकी थिइन् ।

क्रिएटर्स फर चेन्ज

मे २०१८ मा उनले युट्युबको क्रिएटर्स फर चेन्जमा भाग लिएकी थिइन् । उनले आफ्नो प्रतिवेदनको रूपमा नो ओफेन्स नामक गीत बनाएकी थिइन्, जसलाई संयुक्त राष्ट्र सङ्घमा अन्तर्राष्ट्रिय सहिष्णुता दिवसको अवसरमा देखाइएको थियो ।

सन् २०२० मा क्रिएटर्स फर चेन्जको एक विशेष भागको लागि प्राजक्ताले मिसेल ओबामा, लाइजा कोशी र थेम्बे माहलाबासँग मिलेर विभिन्न देशका केटीहरूसँग उनीहरूको पढाइको अवसर र अवस्थाबारे अन्तर्वार्ता गरिन् ।

द कल टु युनाइट र रूम टु रीड

१ मे २०२० मा ओपरा विनफ्री, जुलिया रोबर्ट्स, इभा लङ्गोरिया, दीपक चोपडालगायत अन्य व्यक्तित्वहरू मिलेर आयोजित द कल टु युनाइटमा प्राजक्ताले भारतको प्रतिनिधित्व गरिन् । २०१९-२० कोरोना भाइरस प्रकोपले प्रभावित आम जनताको समर्थन र बाल शिक्षाको महत्त्व झल्काउने उद्देश्यले आयोजित यस २४ घण्टा लामो कार्यक्रम युनाइट र रूम टु रीडको सहकार्यले सफल भयो ।

गायन र सङ्गीत

वर्ष	नाम
सन् २०१७	"शेमलेस"
सन् २०१८	"नो ओफेन्स"
सन् २०२०	"ये डिस गाना है"
सन् २०२०	"पर लकडाउन होगया"

अभिनय

वर्ष	नाम	भूमिका	निर्देशक	भाषा	टिप्पणी
सन् २०२०	खयाली पुलाव	आशा	तरुण डुडेजा	हरियाणवी	युट्युबमा निकालिएको छोटो चलचित्र

बाह्य कडी

• आधिकारिक वेबसाइट
• फेसबुकमा प्राजक्ता कोली
• प्राजक्ता कोली ट्विटरमा
• इन्स्टाग्राममा प्राजक्ता कोली