श्याम गोतामे

श्याम गोतामे ( वि.सं. १९९६ भदौ २६ – वि.सं. २०५५ वैशाख १९) नेपाली हास्य-व्यङ्ग्यकार तथा निबन्धकार थिए।

जन्म

श्याम गोतामेको जन्म वि.सं. १९९६ भदौ २६ गते ज्वालाप्रसाद गौतम र राधादेवी गौतमको जेठा छोराको रूपमा काठमाडौँस्थित पाको पोखल्ड्याङमा भएको थियो। श्यामको न्वारनको नाम रेवती गौतम राखिएको भएपनि नागरिकता प्रमाणपत्रमा चाहिँ श्यामप्रसाद गौतम नाम रहेको देखिन्छ।

शिक्षादीक्षा

उनको बुवा ज्वालाप्रसादको नेपाल सरकारको कर्मचारी भएकोले अस्थिरता र अव्यवस्थाकैबीच गोतामे वि.सं. २००९ सालमा गौरस्थित श्री ३ जुद्ध हाईस्कूलमा एकैचोटी ९ कक्षामा भर्ना भए। भर्ना भएको दुई वर्षपछि वि.सं. २०११ सालको प्रवेशिका परीक्षामा सामेल भई उक्त परीक्षामा तृतीय श्रेणीमा उत्तीर्ण गरेका थिए।

एस.एल.सी. उत्तीर्ण गरेपछि गोतामे वीरगञ्जस्थित ठाकुरराम बहुमुखी क्याम्पसको रात्रिकक्षामा भर्ना भइ अध्ययनलाई अगाडि बढाउन थाले। उनले वि.सं. २०१३ सालमा पटना विश्वविद्यालयबाट प्रमाण पत्रतहको परीक्षामा सामेल भई उत्तीर्ण भए।

व्यक्तिगत जीवनी

गोतामेको वि.सं. २०१३ साल असार १७ गते पद्मा शर्मासँग विवाह भएको थियो। उनको दुई छोरा र दुई छोरीहरू छन्।

साहित्यिक लेखनमा प्रवेश

उनले लेखेको पहिलो हास्यव्यङ्ग्य रचना 'मैले पनि पिउन सिकें' वि.सं. २०२५ साल माघ २६ गतेको गोरखापत्रमा प्रकाशित भएको थियो। त्यसपछि उनले 'गोरखापत्र', 'समीक्षा', 'प्रतिध्वनि', 'रूपरेखा', 'मातृभूमि' जस्ता पत्रपत्रिका र हास्यव्यङ्ग्यपरक सामयिक सङ्कलनमा प्रकाशित भएका हास्यव्यङ्ग्य रचनाहरूको पहिलो कृतिको रूपमा मपाईं निस्किएको थियो। कौवा प्रकाशनको १०औँ प्रकाशनका रूपमा निस्किएको यस कृतिमा जम्मा १६ वटा हास्यव्यङ्ग्य रचना सङ्कलित थियो।

कृतिहरू

• मपाईं
• जदौ
• कायेनवाचा
• श्याम गोतामेका प्रतिनिधि हास्यव्यङ्ग्य

पुरस्कार तथा सम्मान

• भैरव हास्यव्यङ्ग्य पुरस्कार २०४९

अवशान

हास्यव्यङ्ग्य लेखनमा प्रवेश गरेका श्याम गोतामेको नेपाली हास्यव्यङ्ग्यमा दीर्घजीवन बाचेर आकस्मिक ढङ्गले वि.सं. २०५५ साल वैशाख १९ गते बिहान पौने ५ बजेतिर देहान्त भयो। उनको मृत्यु हुदा उनको उमेर ५९ वर्ष पुगेको थियो।

बाह्य कडीहरू

• http://www.samakalinsahitya.com/?show=detail&art_id=2066