मैथिली ठाकुर

मैथिली ठाकुर एक भारतीय गायिका हुन्। सन् २०१७ मा भारतीय गायन रियालिटी कार्यक्रम राइजिङ स्टारको पहिलो संस्करणमा सहभागिता जनाएपछि उनले चर्चा पाएकी हुन्। सो गायन कार्यक्रममा ॐ नम: शिवाय बोलको गीत गएपछि उनलाई सोझै फाइनलको लागि छनौट गरिएको थियो। मैथिली सो रियालिटी कार्यक्रमको फाइनलमा पुग्ने पहिलो प्रतिस्पर्धी थिइन्। २ मतको झिनो अन्तरले उनलाई दोस्रो स्थानमा चित्त बुझाउनु परेको थियो। यसै रियालिटी कार्यक्रममा उनको सफलताले उनको इन्टरनेट लोकप्रियता ह्वात्तै बढेको थियो। उनीद्वारा युट्युब र फेसबुकमा पोस्ट गरिने भिडियोहरूमा ७०,००० देखि ७० लाखसम्म झलक आउने गरेको छ। उनले विशेषगरि मैथिली तथा भोजपुरी गीतहरू गाउने गरेकी छिन् जसमा छठको गीत र कजरी पनि रहेको छ। यस वाहेक उनी बलिउड चलचित्रको गीत र भारतको अन्य राज्यको लोकगीतहरू गाउने गरेकी छिन्।

मैथिली ठाकुर
मैथिली ठाकुर
व्यक्तिगत जानकारी
जन्म	(2000-07-25) २५ जुलाई २००० बेनिपट्टी, मधुबनी, बिहार
राष्ट्रियता	भारतीय
पेसा	गायिका, इन्टरनेट सनसनी, विद्यार्थी
युट्युब जानकारी
च्यानल	मैथिली ठाकुर
सक्रिय वर्ष	२०१४-वर्तमान
पाठक	१.२६ मिलियन पाठक
कूल झलक	९,१८,९०,०७० झलक (१४ सेप्टेम्बर २०१९)
प्ले बटन १,००,००० पाठकहरू २०१७ १०,००,००० पाठकहरू जुन २०१९

उनको युट्युब भिडियोमा उनीसँगै उनको दुई साना भाइ रिषभ र आयाची समेत देखिन्छन्। रिषभ तबला वादकको रूपमा र आयाची गायकको रूपमा उनलाई सहयोग गर्ने गरेका छन्। सन् २०१९ मा भारतीय निर्वाचन आयोगले उनीसमेत उनको दुवै भाईलाई मधुबनीको ब्रान्ड एम्बेसडर बनाएको थियो। सन् २०१५ मा उनले भारतीय साङ्गीतिक कार्यक्रम 'आई जिनियस यङ सिङ्गिङ स्टार' जितेकी थिइन् र सोही वर्ष उनले 'या रब्बा' (युनिभर्सल म्युजिक) नामक साङ्गीतिक एल्बम बजारमा ल्याएकी थिइन्। उनको फेसबुक पृष्ठमा २० लाख र इन्स्टाग्राम खातामा ७० लाख फोलोअर्स छन्।

बाह्य कडीहरू

• इन्टरनेट चलचित्र डेटाबेसमा मैथिली ठाकुर