महाजात्रा

महाजात्रा एक नेपाली हास्यप्रधान चलचित्र हो। षट्कोण आर्ट्सको ब्यानरमा निर्माण भएको यस चलचित्रका निर्देशक तथा लेखक प्रदीप भट्टराई हुन्। म्याक्स दिपेश खत्री, यज्ञेश्वर पौडेल र रवीन्द्रसिंह बानियाँद्वारा निर्मित यो चलचित्र २०७९ चैत ९ गते, प्रदर्शनमा आएको थियो। चलचित्रमा हरिवंश आचार्य, विपिन कार्की, रवीन्द्रसिंह बानियाँ, रवीन्द्र झा र वर्षा राउतको अभिनय रहेको छ। यो २०७६ मा प्रदर्शनमा आएको चलचित्र जात्रै जात्राको उत्तरकथा हो। यो चलचित्र चालिस देशहरूमा प्रदर्शन गरिएको थियो।

महाजात्रा
रङ्गमञ्च प्रदर्शित पोस्टर
निर्देशक	प्रदीप भट्टराई
लेखक	प्रदीप भट्टराई
निर्माता	म्याक्स दिपेश खत्री यज्ञेश्वर पौडेल रवीन्द्रसिंह बानियाँ (कार्यकारी निर्माता)
मुख्य कलाकार	हरिवंश आचार्य विपिन कार्की रवीन्द्र झा रवीन्द्रसिंह बानियाँ वर्षा राउत
सम्पादन	मित्र गुरुङ
सङ्गीत	आशिष अविरल
वितरक कम्पनी	षट्कोण आर्ट्स
वितरक	स्टेसन ५ (काठमाडौँ) डिसिएन (नेपाल) एमएसएम इन्टरटेन्मेन्ट्स (अन्तर्राष्ट्रिय)
प्रदर्शन मिति	२०७९ चैत ९
अवधि	१६० मिनेट
देश	नेपाली
भाषा	नेपाली
बजेट	रु २.५ करोड
बक्स अफिस	रु २७.०८ करोड

पात्रहरू

• हरिवंश आचार्य पुण्यप्रसादको रूपमा
• विपिन कार्की फणिन्द्र तिम्सिना
• रवीन्द्रसिंह बानियाँ जोयसको रूपमा
• रवीन्द्र झा मुन्नाको रूपमा
• वर्षा राउत सम्पदाको रूपमा
• राजाराम पौडेल
• अर्जुनजङ्ग शाही
• शिशिर वाङ्देल
• मोहन निरौला
• पुष्कर गुरुङ
• प्रकाश घिमिरे
• गौमाया गुरुङ
• दिव्य देव भाइरल इन्स्पेक्टर खत्रीको रूपमा
• रजनी गुरुङ
• सुमन कार्की

गीतहरू

२०८० माघ १ आशिष अविरल र अस्मिता अधिकारीको आवाजमा रहेको पहिलो गीत 'हाम्रो जोडी' २०८० माघ १ मा सार्वजनिक भएको थियो। गीतको शब्द एकनारायण भण्डारीले लेखेका हुन्। दोस्रो गीत साथी, २०८० चैत १४ मा कालीप्रसाद बास्कोटाको स्वर र सङ्गीतमा सार्वजनिक भएको थियो। गीतको शब्द हर्क साउदले लेखेका थिए।

क्र.सं.	शीर्षक	शब्द	गायक/गायिका(हरू)	लम्बाइ
१.	"हाम्रो जोडी"	एकनारायण भण्डारी	आशिष अविरल, अस्मिता अधिकारी	४:०१
२.	"साथी"	हर्क साउद	कालीप्रसाद बास्कोटा	२:३९
कुल लम्बाइ:				६:४०

प्रतिक्रिया

बक्स अफिस

यो चलचित्रले पहिलो हप्तामा ६.२४ करोडको व्यापार गरेको थियो जसले गर्दा यो नेपाली चलचित्र उद्योगमा एक प्रमुख सुपरहिट चलचित्र बनेको थियो। यस चलचित्रले प्रदर्शनको पहिलो १० दिनमा नेपालमा ८.०८ करोड र विदेशमा ५ करोडको व्यापार गरेको थियो। यस चलचित्रले प्रदर्शनको तेस्रो हप्ताको अन्त्यसम्ममा विश्वव्यापी रूपमा २३.१ करोड कमाएको थियो जसमा नेपालबाट १४.१ करोड र विदेशबाट लगभग ९ करोड समावेश छ। यस चलचित्रले चार हप्ताको अन्त्यमा नेपालबाट १५.९० करोड र विदेशबाट १०.७५ करोड कमाएर कुल २६.६५ करोड कमाएको थियो। यसको सफल ५१ दिनको दौडपछि, चलचित्रले नेपालमा १६.०८ करोड र विदेशबाट ११ करोड सङ्कलन गर्न सफल भएको थियो जसले यसलाई २०८० को सबैभन्दा बढी कमाई गर्ने नेपाली चलचित्र, विदेशमा सबैभन्दा बढी कमाई गर्ने नेपाली चलचित्र र अहिलेसम्मकै सबैभन्दा धेरै कमाई गर्ने नेपाली चलचित्रहरूमध्ये एक बनाएको थियो।

समालोचना

चलचित्रले समीक्षकहरूबाट मिश्रित प्रतिक्रिया प्राप्त गरेको थियो।

बाह्य कडीहरू

• इन्टरनेट चलचित्र डेटाबेसमा महाजात्रा