क्यूआर कोड

क्यूआर कोड (विस्तृत रूपमा क्विक रेस्पोन्स कोड) एक प्रकारको म्याट्रिक्स बारकोड हो । यसलाई जापानको सवारी साधन निर्माण गर्ने कम्पनी डेन्सो वेभले सन् १९९४ मा आविष्कार गरेको थियो । बारकोड मेसिनले पढ्न सक्ने जानकारी हो, जसमा सामानको बारेमा जानकारी हुने गर्दछ। व्यवहारमा, क्यूआर कोडहरूले प्राय: वेबसाइट वा एपको लोकेटर, पहिचानकर्ता वा ट्र्याकरको डेटा समावेश गर्दछ। क्यूआर कोडले डेटा कुशलतापूर्वक भण्डारण गर्न चार मानकीकृत एन्कोडिङ मोडहरू (संख्यात्मक, अल्फान्यूमेरिक, बाइट/बाइनरी, र कान्जी) प्रयोग गर्दछ।

अंग्रेजी विकिपिडिया मोबाइल मुख्य पृष्ठको युआरएल को लागि क्यूआर कोड।

इतिहास

क्यूआर कोड प्रणाली सन् १९९४ मा जापानको डेन्सो वेभ अटोमोटिभ प्रोडक्ट्स कम्पनीमा आविष्कार गरिएको थियो। मासाहिरो हारा नेतृत्वको अनुसन्धानकर्ता समूहले प्रस्तुत गरेको प्रारम्भिक वैकल्पिक-चौकोर डिजाइन गो बोर्डमा खेलिने कालो काउन्टर र सेतो काउन्टरबाट प्रभावित भएर प्रस्ताव गरेका थिए। स्थिति पत्ता लगाउने मार्करहरूको ढाँचा छापिएको सामग्रीमा कालो-सेतो क्षेत्रहरूको कम प्रयोग हुने क्रम (१:१:३:१:१) पत्ता लगाएर निर्धारण गरिएको थियो। क्यूआर कोड प्रणालीको मुख्य उद्देश्य विभिन्न सवारी साधनका पार्ट्सको प्रकार र सङ्ख्या पत्ता लगाउन सजिलो बनाउनु थियो। यसले प्रत्येक सवारी साधनको पार्ट्सको बाकसमा व्यक्तिगत रूपमा स्क्यान गरिने बार-कोड लेबलहरूलाई प्रतिस्थापन गरी एउटा मात्र लेबलमा सबै डेटा समावेश गर्न सहयोग पुर्‍याएको थियो। क्यूआर कोड प्रणालीको चतुर्भुज संरचनाले विभिन्न बार-कोड लेबलहरूको डेटा कन्जी, काना, र अल्फान्यूमेरिक कोडहरूसँग एकै लेबलमा एकीकृत गरेको थियो।